Төрле төбәкләрдән мөселман кардәшләр Татар Төке авылында Абыз Кадыкай кабере янына җыелды
Майның соңгы җомгасында, дистә еллар дәвамында, Чүпрәле районының Татар Төке авылында изге Кадыкай абыз бабай истәлегенә багышланган истәлекле чара уза.
Кадыкай абыйның кабере Татар Төке авылының көньяк читендә урнашкан. Кабер ташы Изге Язмалар белән бизәлгән. Соңгы елларда каберлек тирәсендәге территория республика программалары һәм меценатлар кысаларында, шулай ук җирле халык һәм Иске Кәкерле авыл җирлеге администрациясе тырышлыгы белән төзекләндерелде. Ел саен бу изге урынга килүче хаҗилар өчен биредә барлык кирәкле шартлар тудырылган.
Тантана гадәттәгечә Коръән укудан башланды. Район мөхтәсибе Данир хәзрәт Шәрәфетдинов бу рухи чараның зур әһәмияткә ия булуын билгеләп үтте. Аннан соң район һәм күрше өлкәләрдән килгән имам-хатыйблар вәгазьләр сөйләделәр, дин нигезләрен аңлаттылар һәм изге китаптан сүрәләр укыдылар, догалар белән Кадыкай абыз рухына мөрәҗәгать иттеләр.
Тантаналы җыелышта «Татарстан Республикасы Муниципаль берәмлекләре Советы» Ассоциациясе рәисе Әгъзам Гобәйдуллин, Чүпрәле районы башлыгы Марат Гафаров катнашты. Алар җыелучыларны рухи бәйрәм белән котладылар, бу изге традиция киләчәктә дә шундый ук бердәмлек рухында сакланыр дигән өмет белдерделәр.